करवंद आणि आदिवासी

आज करवंद ही बोलू लागली
आदिवासी जन्माची गाणी
काळ्या कातडीखाली
गोडीतुन सांगती गा-हाणी

ऊन असो वा पाऊस
डोक्यावर जगणे बांधलेले
खिशात नसली दमड़ी
मन जगासाठी सदा मांडलेले

हिरव्या पानामंधी करवंद
जिभेवर लाळ घोळवती
उघडा-नागडा आदिवासी
परी संस्कृती सदा जपती

काळ्या मैनेचे हे प्रेम
चाखली हजारोंनी माया
कातळ-कपारितला गोडवा
नांगरताना गायी आभाळमाया

काटयांचे असणे कधी
करवंदाला टोचत नाही
संकटांचे जगणे बाई
सरकारला बोचत नाही

हिरवाईचा शालू बघा कसा
करवंद जपतो आहे
फाटलेली मने विकासाची
आदिवासी शिवतो आहे

उघड्या माळरानावर सदा
जाळी करवंदाची रूपवती
योजनांचा वंचित राजा
सह्याद्री संस्कृती पेरती

निसर्ग संस्कृतीचे ग्रहण
झाडे करवंदाची गळु लागली
आदिवासी बांधवाचे मरण
घुसखोरी कोर्टातुनही जिंकु लागली

©Raju Thokal